Psalms 44

Kuomba Ulinzi Wa Mungu

(Kwa Mwimbishaji: Utenzi Wa Wana Wa Kora)

1 ^aEe Mungu, tumesikia kwa masikio yetu,
baba zetu wametueleza
yale uliyotenda katika siku zao,
siku za kale.

2 ^bKwa mkono wako uliwafukuza mataifa
na ukawapanda baba zetu,
uliangamiza mataifa
na kuwastawisha baba zetu.

3 ^cSio kwa upanga wao waliipata nchi,
wala si mkono wao uliwapatia ushindi;
ilikuwa ni kitanga cha mkono wako wa kuume,
na nuru ya uso wako,
kwa kuwa uliwapenda.

4 ^dWewe ni mfalme wangu na Mungu wangu,
unayeamuru ushindi kwa Yakobo.

5 ^eKwa uwezo wako tunawasukuma nyuma watesi wetu;
kwa jina lako tunawakanyaga adui zetu.

6 ^fSiutumaini upinde wangu,
upanga wangu hauniletei ushindi;

7 ^gbali wewe unatupa ushindi juu ya adui zetu,
unawaaibisha watesi wetu.

8 ^hKatika Mungu wetu tunajivuna mchana kutwa,
nasi tutalisifu jina lako milele.

9 ⁱLakini sasa umetukataa na kutudhili,
wala huendi tena na jeshi letu.

10 ^jUmetufanya turudi nyuma mbele ya adui,
nao watesi wetu wametuteka nyara.

11 ^kUmetuacha tutafunwe kama kondoo
na umetutawanya katika mataifa.

12 ^lUmewauza watu wako kwa fedha kidogo,
wala hukupata faida yoyote kwa mauzo yao.

13 ^mUmetufanya lawama kwa jirani zetu,
dharau na dhihaka kwa wale wanaotuzunguka.

14 ⁿUmetufanya kuwa mithali miongoni mwa mataifa,
mataifa hutikisa vichwa vyao.

15 ^oFedheha yangu iko mbele yangu mchana kutwa,
na uso wangu umejaa aibu tele,

16 ^pkwa ajili ya dhihaka ya wale wanaonilaumu na kunitukana,
kwa sababu ya adui, ambaye anatamani kulipiza kisasi.

17 ^qHayo yote yametutokea,
ingawa tulikuwa hatujakusahau
wala hatujaenda kinyume na agano lako.

18 ^rMioyo yetu ilikuwa haijarudi nyuma;
nyayo zetu zilikuwa hazijaiacha njia yako.

19 ^sLakini ulituponda na kutufanya makao ya mbweha,
na ukatufunika kwa giza nene.

20 ^tKama tungalikuwa tumelisahau jina la Mungu wetu
au kunyooshea mikono yetu kwa mungu mgeni,

21 ^uje, Mungu hangaligundua hili,
kwa kuwa anazijua siri za moyo?

22 ^vHata hivyo kwa ajili yako tunauawa mchana kutwa;
tumehesabiwa kama kondoo wa kuchinjwa.

23 ^wAmka, Ee Bwana! Kwa nini unalala?
Zinduka! Usitukatae milele.

24 ^xKwa nini unauficha uso wako
na kusahau taabu na mateso yetu?

25 ^yTumeshushwa hadi mavumbini,
miili yetu imegandamana na ardhi.

26 ^zInuka na utusaidie,
utukomboe kwa sababu ya upendo wako usio na mwisho.